Ang tag-ulan na nauugnay sa southwest monsoon o kilala bilang “habagat” ay inaasahang aarangkada sa susunod na mga araw, ayon sa Climate Monitoring and Prediction Section (CLIMPS) ng Philippine Atmospheric, Geophysical and Astronomical Services Administration (PAGASA) .
Sa isang climate outlook forum nitong Miyerkules, Mayo 24, sinabi ni CLIMPS chief Ana Liza Solis na ang tag-ulan ay maaaring magsimula sa “susunod na dalawang araw,” lalo na sa mga lugar na nauuri bilang Climate Type 1.
Ang Metro Manila, gayundin ang kanlurang bahagi ng Luzon at Visayas, ay may Type 1 na klima. Ang mga lugar na ito ay may dalawang natatanging panahon: tuyo mula Nobyembre hanggang Abril at maulan sa natitirang bahagi ng taon.
Bago maideklara ng PAGASA ang pagsisimula ng tag-ulan sa bansa, dapat matugunan ang ilang pamantayan o kundisyon, kabilang ang kabuuang pag-ulan na 25 millimeters o higit pa sa limang pangunahing weather station sa loob ng limang magkakasunod na araw.
Ang pangangailangang ito ay karagdagan sa paglaganap ng habagat.
Sinabi ng PAGASA na ang paparating na bagyong Mawar, na lokal na tatawagin bilang “Betty” sa sandaling ito ay pumasok sa Philippine area of responsibility, ay maaaring magdulot ng pagsisimula ng tag-ulan sa bansa.
Sa isang press conference nitong Miyerkules, sinabi ni PAGASA senior weather specialist Chris Perez na maaaring magsimulang makaapekto ang monsoon rains sa kanlurang Mimaropa (Oriental Mindoro, Occidental Mindoro, Marinduque, Romblon, Palawan), Visayas, at Mindanao sa Biyernes, Mayo 26 o Sabado, Mayo 27.
Mas maraming lugar sa Southern Luzon at Visayas, aniya, ang inaasahang makakaranas ng monsoon rains sa Linggo, Mayo 28, at maaaring magpatuloy sa mga susunod na araw.
